شركة اوبو من الشركات الى دايما بتهتم بالكاميرا والتصميم المشابه للايفون ودايما بتروج لمنتجاتها على انها شبيهة بالايفون لكن فى الفترة الاخيرة الشركة ابتدى يبقى ليها اسم وشخصية مستقلة بيها وابتدت مبيعاتها تزيد فى مصر والنهارده معانا هاتف جديد من شركة اوبو فى فئة 5500 جنيه وهو هاتف oppo f5 ودى مراجعتى للهاتف
هاتف اوبو اف 5 بييجى بتصميم من المعدن والتصميم مبهر الحقيقة بس من ناحية الشاشة فقط لكن الضهر عادى جدا ولما نيجى نتكلم على الشاشة فالشاشة بتيجى بالابعاد الجديدة 18:9 وشكلها جميل جدا الحقيقة والشركات كلها هتبقى موبايلاتها كلها بالابعاد دى الفترة الى جاية الشاشة بقياس 6 بوصة لكن متحسش ابدا انها 6 بوصة ومسكة الموبايل مريحة جدا فى الايد والشاشة بدقة 1080:2160 full hd plus بكثافة بكسلات 402 بكسل فى الانش محمية بطبقة gorilla glass 5 والشاشة مبهرة فى الوانها لانها من نوع ltps lcd والنوع ده اقرب لشاشات سوبر امولد وبيدى تشبع فى الالوان ووضوح رؤية مبهر جدا .
الهاتف بييجى ب 4جيجا رام وذاكرة 32 جيجا بايت مع امكانية تركيب كارت ميمورى بس لازم تضحى بشريحة من شريحتين الجهاز علشان تركب كارت ميمورى.
الهاتف بييجى بمعالج helio p23 ثمانى النواة بتردد 2.5 جيجا هيرتز والمعالج ده من شركة ميديا تيك والمعالج جيد فى ادائه وبيأدى المطلوب منه بامتياز ومعاه معالج رسوميات mali-g71 mp2 وده معالج رسومى متوسط ولكن بيشغل الالعاب بدون اى مشكلة سواء العاب متوسطة او عالية .
الهاتف بييجى باندرويد نوجا 7.1.1 مع واجهة تشغيل color os 3.2 .
الهاتف بييجى بكاميرا اساسية 16 ميجا بكسيل مع فلاش ليد كاميرا ممتازة فى الاضائة الجيدة ولكن فى الاضائة الخفيفة بيبتدى يظهر نويز خفيف بفتحة عدسة 1.8 ودى فتحة عدسة ممتازة فى الفئة السعرية وبتدخل ضوء اكتر فى الاضائة المنخفضة .
بييجى بكاميرا امامية 20 ميجا بكسيل بفتحة عدسة 2.0 ودى هتبقى افضل كاميرا سيلفى فى تليفونات الفئة المتوسطة لحد 10000 جنيه ادائها ممتاز فى الاضائة الجيدة والاضائة المنخفضة بتدى اداء جيد .
بطارية الهاتف بسعة 3200 ملى امبير لا تدعم الشحن السريع ادائها جيد بتدى 5 ساعات سكرين اون تايم استخدام فوق المتوسط .
الهاتف لايدعم تشغيل نظارات الواقع الافتراضى vr لانه لا يحتو على سينسور جيروسكوب .
بصمة الجهاز فى الجهة الخفية وهيا بصمة سريعة جدا .
الخلاصة دايما شركة اوبو بتركز على نقاط معينة فى الهاتف وبتركز دعايتها عليها وركزت فى الهاتف ده على الشاشة والكاميرا فينصح لهواة السيلفى ان الهاتف ده انسب موبايل ليهم ورام 4جيجا رام وذاكرة32 جيجا وسعر 5500 جنيه يبقى للمستخدم تحديد الانسب ليه وسط كل هواتف الفئة السعرية دى .
ليست هناك تعليقات:
إرسال تعليق